प्रेस चौतारीले घोषणा गर्यो यसबर्षको पत्रकारिता पुरस्कार

 अमरगढी पोष्ट समाचार
डडेल्धुरा माघ २४ । प्रेस चौतारी नेपालले यसवर्षको पत्रकारिता पुरस्कार घोषणा गरेको छ । बरिष्ठ पत्रकार गोबिन्द पोखरेलको संयोजकत्वमा गठित सिफारिश समितिको सिफारिशको आधारमा यस बर्षको स्थापना दिवसमा प्रेस चौतारीले ११ जना अग्रज र क्रियाशील पत्रकारलाई पुरिस्कृत गर्ने निर्णय गरेको हो । पुरुष्कृत हुनेमा सुदुरपश्चिम प्रदेशका अग्रज पत्रकार तथा सुदुरसन्देश दैनिकका सम्पादक हेमन्त पौडेल र डडेल्धुराका सकृय पत्रकार तथा नेपाल टेलिभिजन डडेल्धुराका सम्बाददाता र अमरगढी पोष्ट दैनिकका समाचार प्रमुख हरिश चन्द समेटिएका छन । प्रेस चौतारीका महासचिव हिरामान लामाले आज विज्ञप्तिमार्फत दिनुभएको जानकारी अनुसार हृदयचन्द्रसिंह प्रधान स्मृति पत्रकारिता पुरस्कारबाट नेपाल प्रेसका प्रधानसम्पादक मातृका पौडेललाई सम्मानित गर्ने निर्णय गरिएको छ ।

 यस्तै, सुदूरसन्देश दैनिकका सम्पादक हेमन्त पौडेललाई अग्निशिखा स्मृति, शान्ति गुरुङलाई डा शान्ति पाण्डे प्रेस चौतारी महिला पत्रकारिता, लालबाबु शेख र रिमा सोमैलाई वीरेन्द्रकुमार शाह क्रियाशील पत्रकारिता पुरस्कार प्रदान गरिने भएको छ । यसैगरी टपेन्द्र कार्की र मालती केसीलाई डेकेन्द्र थापा स्मृति पत्रकारिता, उषा तामाङ र रोशनी कठेतलाई सावित्रीदेवी(पद्यलक्षमी बस्नेत स्मृति र गार्डेन राई र हरिश चन्द्लाई चन्द्र न्यौपाने शान्तिराम कार्की स्मृति पत्रकारिता पुरस्कार प्रदान गरिने महासचिव हिरामान लामाले बताउनु भएको छ । हृदयचन्द्रसिंह स्मृति पुरस्कार प्रेस चौतारी नेपालको सबैभन्दा ठूलो राशिको पुरस्कार हो । नेपाली साहित्यका अग्रज साहित्यकार तथा कवि हृदयचन्द्र सिंह प्रधानको स्मृतिका स्थापित यो पुरस्कारबाट यसअघि नेपाल पत्रकार महासंघका अध्यक्ष शिव गाउँले,बरिष्ठ पत्रकार शम्भु श्रेष्ठ,गोपाल बुढाथोकी, गोबिन्द पोखरेल, तीर्थ कोइराला, निर्मला शर्मा, रघु मैनाली, अखण्ड भण्डारीलगायत पुरस्कृत भइसक्नूभएको छ ।

हरेक वर्ष स्थापना दिवसका अवसरमा माघ २२ गते प्रदान गर्दै आएको सो पुरस्कार चौतारीले १० औँ महाधिवेशनको उदघाटन समारोहमा विराटनगरमा प्रदान गर्ने प्रेस चौतारीले जनाएको छ । नेकपा एमालेका अध्यक्ष समेत रहनुभएका प्रधानमन्त्री केपी शर्मा ओलीले पुरस्कार प्रदान गर्नुहुने प्रेस चौतारीले जनाएको छ।