दार्चुला प्रहरीको एक्सन ः लकडाउनको अवज्ञा गर्ने २० जना युवा नियन्त्रणमा
किरन धामी
दार्चुला चैत १२ गते स् कोराना भाइरसको संक्रमण नियन्त्रण गर्न सरकारले लकडाउन गरेकोमा अवज्ञा गरेपछि दार्चुलामा प्रहरीले २० जना युवालाई विभिन्न स्थानबाट नियन्त्रणमा लिएको छ । मंगलबार विहान देखि लागु भएको लकडाउन उल्लङ्घन नगर्न आग्रह गर्दै प्रहरी र प्रशासनले माइकिङ गर्दा पनि अटेर गर्नेलाई नियन्त्रणमा लिएको जिल्ला प्रहरी कार्यालय दार्चुलाका प्रहरी निरिक्षक एवं सुचना अधिकारी सुरेन्द्र प्रसाद जोशीले जानकारी दिनुभयो ।
प्रहरीले महाकाली नगरपालिकाको वडा नम्बर ५ गल्फै, वडा नम्बर ७ धाप र वडा नम्बर ४ बंगाबगडबाट २० जना युवाहरुलाई नियन्त्रणमा लिएको उहाले बताउनुभयो । प्रहरीले भिडभाड नगर्नुस भन्दा भन्दै पनि आभारा भएर घुम्न लागेका तथा समुह बनाएर जम्मा भएका युवाहरुलाई नियन्त्रण लिएको उहाको भनाई छ । प्रहरीले सम्झाई बुझाई गर्दा समेत नमानेको भन्दै उनिहरुलाई नियन्त्रण लिएर जिल्ला प्रहरी कार्यालयमा राखिएको छ ।
कोराना संक्रमण भएमा त्यसले भयावह अवस्था सिर्जना गर्ने भन्दै पुर्व सावधानी अपनाउन सरकारले पटक‐पटक आग्रह गर्दै आएको छ । लकडाउनको अवज्ञा गरी मनोमानी ढंगले हिडिरहेका र भिडभाड हुने गरी एक ठाँउमा जम्मा भएका युवाहरुलाई नियन्त्रणमा लिएको उहाले बताउनुभयो ।
